سەنتەرێ کۆماتە بەردەوامە د تۆمارکرن و دێکۆمێنترکرنا دیرووکا قارەمانێن کوردستانێ دا

ھەڤدیتنا مە یا ڤێ جارێ دگەل پێشمەرگێ دێرین و ئێک ژ ئامر مەفرەزێن دەستپێکی یێن شۆڕشا گولانێ بەڕێز حەجی بێتکاری بوو .

حەجی بێتکاری ل ١٩٦٨ پەیوەندیێ ب شۆڕشا ئەیلولێ دکەت و وەکی پێشمەرگەکێ ملکەچ و خودان دسپلین درێژیێ ب خەباتا خوە ددەت ھەتا شکەستنا سالا ١٩٧٥.

ئەو خوە ڕادەستی ھەستێ شکەستن و ئیرادا دوژمنی ناکەت، لەوما چارەنڤیسێ خوە ددەتە دەست قەدەرێ و ژیانا پەنابەریێ وەکی دەھان ھزار کوردێن دێ دھەلبژێریت و د باکوورێ کوردستانێ ڕا خوە دگەهینیتە ئیرانێ، لێ ل وێرێ ژ لایێ ڕژێما گوڕبەگۆڕا ئیرانێ ڤە تێت گرتن و ڕادەستی ڕژبما فاشی یا عێراقێ دکەن و ڕژێما عێراقێ وان دگرن و پاشی دھێنە دویرئێخستن بۆ دیوانیێ ل ژێریا عێراقێ و پاشی ژی تێن و برسی بۆ گوندێن بیابانا ناسریێ.

کەلەکەلا عەشقا شۆڕشێ و چیایێن کوردستان ل مام حەجی ددەت و ئەو گەرم و تۆزا بیابان عێراقێ ل پاش خوە دهێلیت و ب دزیکیڤە خوە دگەھێنیت بەغدا و ژوێرێ بۆ میسل و پاشی بۆ دھۆکێ و پاشی خوە دگەھینن ناڤ بەرواریا و پاشی دەڤەرا چەلێ ل باکوورێ کوردستانێ. ڤی کاروانێ درێژ هەمیێ هەڤالێ ویێ شەهید و دەنگبێژ شەهید بەدەل بێتکاری هەڤرێیێ وی بوو. دگەل ھەلبوونا چریسکا شۆڕشا گولانێ دبیتە بەرپرسێ ئێک ژ مەفرەزێن دەسپێکی یێن شۆڕشێ و بەشداریێ د ئێکەمین کریارێن لەشکەری ل دەڤەرێن نێروەیا و بەرواریا دا دکەت.

حەجی بێتکاری بەشداریێ د کۆنگرێ نەھێ یێ پارتی دا دکەت و پاشی دبیتە ئەندامێ ڕێکخراوا شەھید عبدالرحمن حەمدی و پاشێ بەرپرسیاریا وێ رێکخراوێ وەردگریت و د ھێتە ھنارتن بۆ قرناقە و پشت ئاشان، پاشی دھێتە ڤەگوھازتن بۆ بارەگایێ لق١ و دبێتە جێگرێ بەرپرسێ ڕێکخراوا شەھید مەسیحا کو پاشی ناڤێ وێ دبیتە دارەمان و حەجی بەرپرسیاریا وێ وەردگریت،

پێشمەرگێ دێرین حەجی بێتکاری بەشداریێ دگەلەک شەر و داستانێن شۆڕشا گولانێ دا دکەت، وەکی داستانا سەرێ ئامێدیێ، بامەڕنێ، دێرەلۆکێ.

ل ساڵا ١٩٨٨ پەنابەری تورکیا دبیت و پتر ژ سێ ساڵان ل کەمپا مۆشێ دمینێت، پشتێ سەرھەلدانێ ڤەدگەریتەڤە کوردستانێ و دبیتە ئامر ھێز، پاشێ کادر ل لژنا ناوچا پەیمان و سەرپەرشتیا چار سریێن پێشمەرگەی ژی دکەت..

مام حەجی بێتکاری دکاروانێ دویر و درێژێ خەباتا خوە دا دوو ژ نێزیکترین عەزیزێن خۆە ژ دەست ددەت کو ئەو ژی پسمامێ وی شەھید بەدەل یێ کو هەمی دەما ملێ وی ب ملێ حەجی ڤە بوو و برایێ وی شەھید محەمەد نەزیف.

نوکە ژی مام حەجێ بێتکاری پشتی خەباتەکا دویر و درێژ و تژی ئەڤرازی و نشیڤی و نەخۆشی و دەردەسەری ب پلەکا نە ژ ھەژی ڕەنج و خەبات و قوربانیێن وی ھاتیە خانەنشینکردنی و ل تاخێ تەناهی ل دهۆکێ دژیت.

سەنتەرێ مە چیرۆکا ژیان و خەباتا مام حەجی وەکی یا هەڤچەپەرێن ویێن بەری نوکە هەمی تۆمارکر و دێ ئەرشیف کەت و پارێزیت.