ئەڤ پێشمەرگێ خەباتکەر ل ساڵا 1950 ل بامەرنێ هاتیە دنیایێ. ل ساڵا 1963 ل ژیێ 13 ساڵیێ لگەل خالێ خۆ بوویە پێشمەرگە ل هێزا شێخان.
پشتی شکەستنا سالا 1975 و ل هاڤینا هەمان ساڵێ ئەو و زهێر بامەرنی، أنور بامەرنی، شەهید سالح بامەرنی، شەهید حسێن بامەرنی و چەند کەسێن دی خوە دگەهیننە گوندێ مارونسێ ل باکوورێ کوردستانێ و ل وێرێ مصطفى مزوری، خالد مزوری و محمد سلیم بریفکانی ژی دگەهینە وان، پاشی ابو عنتر ژی ب راسپاردا شەهید ادریس بارزانی ژ ئیرانێ تێت و دگەهیتە وان.
ئەڤ گرۆپە ژ مارونسێ ئامادەکاریێن شۆڕشا گولانێ دکەن و هەر د سالا 1975 دا إسماعیل و هەڤالێن خوە سێ جارا تێنە باشوورێ کوردستانێ ژ بۆ کارێن رێکخستنێ و ئامادەکاریێن شۆڕشێ و ل جارا سیێ بەڵاڤۆکێن شۆڕشێ ل هەمی جهێن گرنگێن بامەرنێ بەڵاڤ دکەن.
ساڵا 1976 ل سەر داخوازا جەوهەر نامقی ئەو بۆ جارا ئێکێ شەهید محمود ئێزدی و عادل مزوری ژ کۆماتەی دگەهینیتە دەڤەرا چەمانکێ.
مخابن ل ساڵا 1977 هەردوو هەڤالێن ویێن نێزیک سالح بامەرنی و حسێن بامەرنی بدەستێ خیانەتکار احمد محمد سلمان ل تەحتە ستویرێ ل ناڤبەرا گوندێ بابیرێ و چەقەلا بشێوەیەکی ببێبەختی تێنە شەهیدکرن. ل هەمان سال ئەو ل برجینی دکەڤنە شەرەکی و هەڤالێ وان دەهام هروری تێتە شەهیدکرن.
ل رۆژا 20/8/1978 دەما ئەو ل مارونسێ ل دەف مالباتا خوە ل بێنڤەدانێ بوو، لەشکەرێ ترکا ب سەر گوندی دا دگرن و کچەکا گوندی یا 19 ساڵی ب سێپێکەکێ ڤە دهەلاویسن و ئەشکەنجە ددەن. وی دەمی إسماعیل و هندەک پێشمەرگێن دی و هندەک ژ خەلکێ گوندی هێرشێ دکەنە سەر لەشکەرێ ترکا و 29 لەشکەرا دکوژن و 4 کەس ژ خەلکێ گوندی ژی شەهید دبن. پشتی فیشەکێن إسماعیل خلاس دبن لەشکەرێن ترکا وی دیل دکەن و دبنە زیندانا ئامەدێ و بۆ دەمێ سێ ساڵا تێتە ئەشکەنجەدان.
پاشی ئازاد دبیت و دچیتە ئەسفەهان ل ئیرانێ کو دەمێ ئەوێ گرتی مالا وی ژ مارونسێ بربوونە ئەسفەهان دەف مالا خالێ وی.
ساڵا 1983 تێت و ل سنوورێ لژنا ئامێدیێ دبیتە پێشمەرگە. ل ئەنفالان ل کەمپا ماردینێ دبیتە پەنابەر. ل سالا 1992 دزڤریتە کوردستانا ئازاد.
ئەو نوکە وەک پێشمەرگەیێ سادە و بێ پلە هاتیە خانەنشین کرن و مخابن تووشی نەخوەشیا پەنجەشێرێ بوویە. بەردەوام ل ترکی و ل سلێمانیێ تێتە چارەسەرکرن. مخابن مووچێ ویێ خانەنشینیێ تێرا دەرمانێن وی تەنێ ناکەت.
هیڤیدارین دەزگایێن پارتی و حکومەتێ یێن پەیوەندیدار خوە ل ڤی قارەمانی بکەنە خودان. چونکی ل دەمەکی کێم زەڵام هەبوون خوە ل ڤی مللەتی بکەنە خودان إسماعیل ب قارەمانی ل کوردستانێ خودان دەرکەت.
سهنتهرێ کۆماته
یێ دێکومهنت کرنا دیرووکا شۆڕشێ
کار و ئهرکێ سهنتهرێ کۆماته دێکۆمێنت کرن و پاراستنا دیرووکا شوڕشێ یه ژ مرن و ژناڤچوونێ.
ڤی سهنتهری ب ستافهکێ بچووک و شیانێن ساده، لێ ب ڤیان و باوهریهکا مهزن، وهک پێنگاڤا خوه یا کاری یا ئێکێ، دهست ب کۆمکرن، دێکۆمنێت کرن و تۆمارکرنا دیرووکا خهبات و شۆڕشا کوردستانێ کریه.
